Uroen er stor i oppdrettsbransjen i Øygarden. Regjeringa sitt forslag om grunnrenteskatt set arbeidsplassar i fare.
Det meinte samstemte deltakarar i tysdagens dialogmøte mellom fiskeoppdrettarane og den kommunale leiinga. Initiativet kom frå ordførar Tom Georg Indrevik som ville høyre kva konsekvensar regjeringa sitt forslag kan føra til i kommunen.
Der fekk han grei beskjed: Dei negative konsekvensane for næringa har allereie starta.
Det er fire verksemder i Øygarden som blir råka av forslaget: Mowi, Lerøy, Blom Fiskeoppdrett og Telavåg Fiskeoppdrett. I neste rekke blir foredlingsindustrien råka, i tillegg til alle underleverandørar.
– Tek livet av bransjen
Oppdrettarane peika i møtet på at forslaget om 40 prosent grunnrenteskatt påverkar enormt. Rammevilkåra er snudd på hovudet, og alle investeringar er stoppa. Investeringar for 17 milliardar er sett på vent.
– Det er nesten ikkje til å tru, sa ein av oppdrettarane om forslaget.
Ein annan med 40 års erfaring frå bransjen, var heilt klar på at forslaget frå regjeringa er det verste han har opplevd. Han meiner ekstra-skatten vil avlive den viktige næringa i Noreg.
– I våre auge er dette ein katastrofe for mange tusen familiar. Ein tilsett i havbruk betyr to tilsette i leverandørindustrien, meinte han.
Forsvinn utanlands
Grunnrenteskatt på 40 prosent fører til at investeringane som skulle skapa framtidige arbeidsplassar no er sett på vent. Bodskapen var at dersom forslaget går gjennom i Stortinget så vil arbeidsplassar innan havbruk hamne andre stader i verda.
– Med eit slikt forslag vil ikkje Noreg få ta del i veksten i næringa, meinte ein av deltakarane.
Ordførar Tom Georg Indrevik avslutta med at kommunen skal uttala seg i saka som er på høyring, og takka deltakarane for innspela.