Inga sak å bygge i Øygarden

Næringslivet har ikkje vore fornøgd med byggesaksbehandlinga i kommunen. Det har gått for sakte og det er for komplisert. Kan byggebransjen og byggesak bli betre venner?

19. februar inviterer Øygarden kommune og Vest Næringsråd heile byggebransjen til eit ope møte. Byggmeisterar, byggefirma, røyrleggjarar, elektrikarar, arkitektar og grunnarbeidarar m.fl. Alle som er ansvarlege søkjarar eller har ansvarsrett i byggesaker.

– Dette gjer vi fordi vi trur det er viktig at begge sider forstår kvarandre sine behov i slike saker, seier Are Frøysland Grande, ny einingsleiar for arealforvaltning i kommunen. Leiarstillinga hans er også ansvarleg for byggesaksavdelinga.

– Som ny her i kommunen vil eg gjerne møta bransjen og få innspel til kor skoen trykkjer for deira del. Og så vil vi gjerne forklare kva nærlingslivet sjølv kan gjera for at byggesaker skal gli betre gjennom systemet. Vi mottar nemleg også mange byggesøknader som inneheld feil.

«Relativt lite» fornøgd

I spørjeundersøking til næringslivet i høve prosjektet «Næringsvennleg kommune» i 2023 svarte over 50 bedrifter frå bygg- og anleggsbransjen.

Tilbakemeldingane var:

Den viktigaste saka for næringslivet er god handtering av byggesaker
Tilfredsheita med byggesaksbehandlinga er «relativt låg»
Etterlyste informasjonskanalar og møteplassar

I same undersøking svara tilsette i kommunen at tenester til næringslivet blei utøvd middels godt. Politikarane meinte i sine svar at handtering av plan- og bygningssaker var eit kjerneområde for forbetring.

– Vi må finne ut om det er lovkrava bransjen ikkje er fornøgd med, eller om det er behandlinga søknaden får i kommunen. Det første er det vanskeleg for oss å gjera noko med. Uansett er det flott om bransjen kjem på dette møtet, og blir med på dialogen, seier Frøysland Grande.

Starter «Handverkargruppa»

Etter det opne møtet i februar vil det bli sett saman ei ressursgruppe i Vest Næringsråd som skal følgje opp problemstillingar som kjem fram. Gruppa skal representera ulike delar av næringa og møte kommunen jamleg.

– Vi vil setta saman ei mindre gruppe som representerer bransjen, og som vil arbeida for å sikra betre og meir effektiv saksbehandling, seier dagleg leiar Kari-Anne Landro i Vest Næringsråd.

Målet med ressursgruppa er:

betre dialog og færre misforståingar
meir komplette søknader, og dermed kortare handsamingstid
tydelegare forventingar mellom kommunen og bransjen
meir føreseieleg praktisering av regelverket
rom for faglege drøftingar og forbetring

– Kommunen vil gjerne møta denne gruppa jamleg og bidra til god kommunikasjon der vi får konkrete utfordringar lagt på bordet. Dette trur vi vil gje betre kvalitet i søknadsgrunnlaga som kjem inn, og dermed betre saksgang, seier næringssjef Marianne Furheim.