Arbeidet med siste del av nyevegen mellom Straume og Ebbesvik er i gang. Den kan utløyse storstilt utvikling av Søre Litlesotra.
– Den nye vegen er viktig både for eksisterande og framtidig busetnad i området. Alle kjenner problematikken med den gamle vegen der bussane står på skrå i Ebbesvikbakken om vinteren. Det har vore ein trøblete veg. Den nye vegen var moden for å byggast no, seier Wenche Snekkevik, styremedlem i Soli Eigedom.
Stillstand utan veg
Soli Eigedom er selskapet fleire grunneigarar i Snekkevik, Ebbesvik og Gavlen starta i 2007 for å stå saman om, og ha ei hand med på utviklinga i området. Ei utvikling som i stor grad har stått stille på grunn av at ny veg til Straume har latt vente på seg. Første oppstart av regulering var i 2006, og nyevegen var ferdig regulert i 2011.
– Ja, det er riktig. Nokre utbyggingsplanar er ferdig godkjent og ventar berre på denne vegen, fortel Snekkevik.
Ebbesvik AS med fleire har ein ferdig godkjent plan om over 150 bustader på Ebbesvik og Ebbesvikneset. I tillegg held Soli Eigedom på med ein reguleringsplan lengre sør.
– Kor mange bustader den planen vil innehalde er vanskeleg å seie før den er ferdig, seier Snekkevik.
Spleiselag betaler
Første del av arbeidet med vegstrekket frå Sotra Arena til Ebbesvik var det Brødrene Ulveseth som bygde for Soli Eigedom. Den delen var ferdig til Obs Bygg opna i mai. No er det Anlegg Vest som står for arbeidet med dei resterande meterane frå byggvaregiganten til Ebbesvik.
– Dei er godt i gang, og vi ser for oss at alt er klart før påske neste år, seier Snekkevik.
Heile strekket frå rundkjøringa ved Sotra Arena og til der den nye vegen møter den gamle vegen i Ebbesvik, blir finansiert av Soli Eigedom i samarbeid med andre aktørar som har interesser i området.
